‘Yansanda Sun Kama Mutane 41 Da Ake Zargi Da Kisan DPO A Kano

Rundunar ‘yansandan jihar Kano ta sanar da kama wasu mutane 41 da ake zargi da hannu a kisan babban jami’in ‘yansanda (DPO) na Rano, CSP Baba Ali, a wani rikici da ya barke a karamar hukumar Rano da ke jihar.

A wata sanarwa da kakakin rundunar ‘yansandan jihar, SP Abdullahi Haruna Kiyawa ya rabawa manema labarai a ranar Alhamis, ya tabbatar da kamen bayan gudanar da bincike cikin gaggawa kan lamarin.

• Ana Fargabar Mutane Da Dama Sun Rasu Sakamakon Ambaliyar Ruwa A Neja
• Sanarwar Bayan Taron Kolin Sin Da ASEAN Da GCC Ta Yi Nuni Ga Burin Kara Dunkulewa Waje Guda

LEADERSHIP ta ruwaito cewa, wasu fusatattun matasa sun kai wa CSP Baba Ali hari a ranar 26 ga watan Mayu biyo bayan rasuwar wani makanikin babur a hannun ‘yansandan. Daga baya, DPO Ali ya rasu a asibitin koyarwa na Aminu Kano (AKTH) a lokacin da yake jinya.

Kwamishinan ‘yansanda, CP Ibrahim Adamu Bakori, ya nanata kudurin hukumar na tabbatar da adalci, yana mai tabbatar wa mazauna yankin cewa, ‘yansandan za su kama duk wadanda suka aikata wannan aika-aika tare da gurfanar da su a gaban kotu.