Kwamitin shirya musabakar gasar karatun alkur’ani na karamar hukumar Igabi da ke Jihar Kaduna ya karrama daliba ‘yar asalin Jihar Kaduna, wacce ta zo ta biyu a gasar karatun alkurani ta duniya.
Daliba mai suna Khadija Tahir Umar, ta kasance ‘yar asalin karamar hukumar Igabi, an ba ta lambar yabon ne bisa jajircewa wajen ganin Jihar Kaduna ta zo ta biyu a a gasar ta duniya.
- Wakilin Sin Ya Soki Yadda Amurka Ke Tafiyar Da Kudurin Takunkuman Sudan Ta Kudu
- Zulum Ya Ba Da Tallafin Karatu Ga Mata ‘Yan Asalin Jihar Da Suka Samu Maki 250 A JAMB
Da yake mika mata lambar yabon, garkuwan musabakar karatun alkurani na Jihar Kaduna, Honarabil Yusuf Ibrahim Zailani ya jinjina wa kokarin dalibar wajen tabbatar da ganin ta daga darajar Jihar Kaduna a idon duniya.
Zailani, wanda shi ne dan majalisar dokokiin Jihar Kaduna mai wakiltar mazabar karamar hukumar Igabi ta Yamma a majalisar dokokin jihar, ya bukaci iyaye da su kara kulawa wajen tarbiyyar da ‘ya’yansu da kuma ba su ilimin addini.
“Ba ku ga yadda wannan dakibar ta fito da darajar karamar hukumar Igabi da Jihar Kaduna a idon duniya ba. Na ba ta kyauta naira miliyan daya, mahaifiyarta da ta kula da ita na ba ta kyauta naira dubu dari hudu, shi Kuma mahaifinta na ba shi kyauta naira dubu dari shida, na ba da wannan kyautar ne domin nuna jin dadina na samun labarin Jihar Kaduna ta zo ta biyu a duniya,” in ji Zailani.
A nasa jawabin, shugaban kwamitin shirya musabakar karatun alkurani na karamar hukumar Igabi, Malam Abubakar Sadik Muhammad (Abu Asim), ya ce duk irin nasarar da kwamitin ya samu, ya samu ne bisa goyon bayan da Honarabul Yusuf Ibrahim Zailani yake ba su. Ya ce shi ne kashin bayan samun nasarar da suka yi a fadin duniya.
Ya bukaci daukacin iyaye da su kara zage damtse wajen ganin ‘ya’yansu sun samu ilimi nagartacce da kuma sanya ido wajen kula da tarbiyyarsu.
Haka zalika, kwamitin shirya musabakar karatun alkurani ya karrama Zailani da lambar yabo bisa irin gudummawar da yake bai wa addinin Musulunci a ciki da wajen Jihar Kaduna.
