Mutane tara ne suka rasa rayukansu a wani mummunan hatsarin mota da ya afku a kauyen Kyaramma da ke karamar hukumar Ringim a jihar JIgawa.
A cewar rundunar ‘yansandan jihar Jigawa, hatsarin wanda ya afku a ranar Asabar da ta gabata da misalin karfe 2 na rana, ya rutsa da wasu motoci kirar Golf 3 saloon guda biyu tare da jikkata wasu da dama.
- Gwamnatin Gombe Ta Yi Albishir Ɗin Gina Babban Zangon Noma Da Kiwo Ɗauke Da Kasuwar Duniya A Jihar
- Ndume Ya Gargaɗi Tinubu Kan 2027: “An Taɓa Yi Wa Jonathan Irin Wannan”
A wata sanarwa da jami’in hulda da jama’a na rundunar ‘yansandan jihar, Shiisu Adam ya fitar, ya bayyana cewa daya daga cikin motocin mai lamba Kaduna MKA 687 AY, wani mutum mai shekaru 35 dan karamar hukumar Hadejia, Adamu Sunusi ne ke tuka motar zuwa garin Gujungu daga Abuja.
A binciken farko da aka gudanar, Adam ya ce, motocin sun yi taho-mu-gamu ne bayan da motar ta kwace wa dayan direban, lamarin da ya sa dukkanin motocin biyu suka kauce hanya. An dauki matakin gaggawa, inda aka garzaya da wadanda suka jikkata zuwa babban asibitin Ringim domin kula da lafiyarsu.
Kwamishinan ‘yansanda, CP A.T. Abdullahi, ya jajantawa iyalan wadanda suka mutu tare da yi wa wadanda suka jikkata fatan samun sauki cikin gaggawa. Ya kuma bukaci direbobi da su rika bin ka’idojin hanya, su guji wuce gona da iri, sannan su tabbatar da cewa, motocin nasu suna cikakkiyar lafiyar zirga-zirga don gujewa afkuwar hadurra.
Sanarwar ta ce, “A yanzu haka fasinjoji 11 suna karbar magani a asibiti kuma suna samun sauki, ana kokarin gano duk wadanda suka rasu domin tuntubar iyalansu.”
