Alkaluman da hukumar kididdiga ta kasar Sin ta fitar a yau Litinin 9 ga wata sun nuna cewa, a watan Mayun bana, ma’aunin farashin kayayyakin masarufi, watau CPI na kasar, ya ragu da kaso 0.1 bisa dari, bisa na makamancin lokacin bara, kuma farashin makamashi ya zama babban dalilin da ya haifar da raguwar. Kana, ma’aunin farashin sarrafa kaya na cikin gida, watau PPI shi ma ya ragu da kaso 3.3 bisa dari, bisa na makamancin lokacin bara, kuma adadin ya ragu da kaso 0.4 bisa dari, idan aka kwatanta da na watan Afrilun bana.
Duk da cewa ma’aunin CPI na watan Mayu ya ragu kadan, amma farashin kayayyaki a wasu bangarori ya canza, al’amarin da ya shaida rawar da manufofin ingiza harkokin saye da sayarwa ke takawa.
Kazalika, babbar hukumar kwastam ta kasar Sin ta bayyana a yau Litinin cewa, a farkon watanni biyar na shekarar da muke ciki, jimillar darajar hajojin da aka yi shige da ficensu a kasar Sin ta kai Yuan tiriliyan 17.94, adadin da ya karu da kaso 2.5 cikin dari, bisa na makamancin lokacin bara, wanda ya ci gaba da karuwa. Kana, jimillar cinikayyar da aka yi tsakanin kasar Sin da kasashen Afirka ta kai matsayin koli a tarihi, inda jimillar hajojin da kasar Sin ta yi shige da ficensu a tsakaninta da kasashen Afirka, ta kai Yuan biliyan 963.21, adadin da ya karu da kaso 12.4 cikin dari, wanda ya dauki kaso 5.4 cikin dari na jimillar darajar hajojin da kasar Sin ta yi shige da ficensu. (Murtala Zhang)
