Allah Ya Yi Wa Sarkin Dutse, Alhaji Nuhu Sunusi, Rasuwa

Allah ya yi wa Sarkin Dutse rasuwa na birnin jihar Jigawa, Alhaji Nuhu muhammadu Sunusi II, kamar yadda gidan talabijin din Channel ta nakalto.

Sarkin mai daraja ta daya a arewa maso yammacin Nijeriya, shi ne tsohon shugaban jami’ar jihar Sokoto.

Alhaji Mustafa Sule Lamido, wanda ke rike da sarautar Santurakin Dutse kuma dan takarar gwamna na jam’iyyar PDP a Jigawa, ya wallafa rasuwar Sarkin a shafinsa na Facebook cikin alhini da jimami.

Kazalika, wata majiya mai tushe ta shaida cewar sarkin ya rasu ne a ranar Talata a Abuja amma ba a shaida wurin da ya rasun ba zuwa yanzu.

Shi dai Alhaji Nuhu Muhammadu Sunusi ya zama sarkin Dutse ne bayan da gwamnatin soji a karkashin marigayi Kanal Ibrahim Aliyu ta nadashi a shekarar 1995 bayan rasuwar mahaifinsa Muhammadu Sunisu.

Alhaji Nuhu ya shafe tsawon shekara 28 a karagar masarautar Dutse da ke da dumbin tarihi a cikin masarautun arewa.

Cikakken labari na tafe..