An bankado Asirin Wasu Ma’aikatan Hukumar RMAFC Bisa Zargi Yin Kutse A Tsarin IPPIS

Shugaban hukumar raba daidai da tarawa gwamnatin tarayya haraji (RMAFC) Dakta Mohammed Bello Shehu, ya tabbatar da bankado wasu ma’aikatan hukumar bisa zarginsu da yin kutse a cikin tsarin biyan ma’aikata albashi na IPPIS.

Ma’aikatan sun yi kutsen ne don kara wa kansu yawan albashin da gwamnati ke biyansu.

• Cire Tallafin Mai: Ina Jajanta Mu Ku, Sadaukarwarku Ba Za Ta Tafi A Banza Ba – Tinubu Ga ‘Yan Nijeriya

Dakta Bello, wanda ya bayyana wa manema labarai hakan, ya ce, an dakatar da wadanda ake zargin har sai an kammala bincike kan zargin, inda ya ce, idan an same su da aikata wannan badakalar da ake zarginsu, za a mika su ga mahukuntan da suka dace, don hukunta su kamar yadda doka ta tanada.

An rahoto cewa, an fara zargin badakalar ne yayin da wani ma’aikaci a mataki na 7 a tsarin biyan albashin gwamnati, wanda ya kamata ya amsa naira N60,000 amma aka biyashi naira N400,000 dai-dai da albashin Darakta.