Chelsea Za Ta Shirya Wa Musulmi Shan Ruwa A Watan Ramadan 

Kungiyar kwallon kafa ta Chelsea ta bayyana cewa za ta haɗa wa Musulmai buɗe-baki a filin wasa na Stamford Bridge a cikin watan Ramadan mai zuwa.  

Hakan yana nufin Chelsea zata kasance kungiya ta farko a kungiyoyin Premier League da za ta haɗa buɗe-bakin na kowa da kowa tare da haɗin gwiwar gidauniyar Ramadan Tent Project.

• Ighalo Yana Son Osimhen Ya Koma Manchester United

Za’a gayyaci masallatai da dama tare da musulman da suke yankin da kungiyar take tare kuma da dalibai musulmi da kuma wasu daga cikin ma’aikatan kungiyar.

Za’a shirya shan ruwan ne tare da hadin gwiwar gidauniyar ‘Ramadan Tent Project, wata gidauniyar taimako da aka kafa tun a shekara ta 2013 domin hade kan al’umma waje daya ba tare da nuna banbanci ba.

Kawo yanzu dai Chelsea ce a mataki na 10 akan teburin gasar firimiyar Ingila da maki 37 bayan buga wasanni 26. Sannan kungiyar ta kai matakin wasan kusa da na kusa da na karshe a gasar cin kofin zakarun turai.

A ranar 23 ga wannan watan ne dai ake saran za’a dauki azumin watan Ramadan a fadin duniya.