Rundunar ‘yansandan jihar Benuwai ta tabbatar da kisan da wasu Mahara suka yi wa babban jami’in kula da yanki na caji ofis din ‘yansanda (DPO) da ke Gwer ta Yamma, Sifiritadan Mamud Abubakar a ranar Talata.
Jami’in hulda da jama’a na hukumar a jihar (PPRO), Catherine Anene, shi ne ya tabbatar da faruwar lamarin, ya kara da cewa za su fitar da cikakken bayanin abun da ya faru nan kusa ga jama’a.
Wakilinmu ya tattaro cewa babban jami’in (DPO) an kashe shi tare da wasu ma’aikatansa a kan hanyar Makurdi zuwa Naka.
Zuwa lokacin da wakilinmu ke aiko mana da labarin nan ya nakalto daga wajen mazauna yankunan cewa maharan sun kuma farmaki kauyen Udei da ke karamar hukumar Guma kuma har sun kashe yara biyu masu shekara 13 da 15 bi da bi.
