Da Dumi-Dumi: ‘Yan Bindiga Sun Kashe Mutum 9, Sun Yi Garkuwa Da 20 A Kaduna

‘Yan Fashin Daji sun kashe wasu mutanen kauyen tara ciki har da ‘yan Bijilante hudu a kauyen Sabon Layi da ke karamar hukumar Birnin Gwari a jihar Kaduna.

An nakalto cewa ‘yan bindigan sun mamayi kauyen ne da yawa inda suka yi ta harbin kan mai wuya da wabi ta yadda suka kashe mutum tara da yin garkuwa da mutum 20 ciki har da makiyaya.

• NIS Ta Kaddamar Da Shirin ‘Guguwa’ Don Dakile Kwararar ‘Yan Ci-Rani A Ribas

Idan za a tuna dai sakamakon samamen da sojoji suka kaddamar sun hallaka shugaban ‘yan bindiga Isiya Danwasa.

Bayanan da aka tattara sun nuna cewa shugaban ‘yan fashin ya yi niyyar tura daya daga cikin yaransa mai suna Yunusa domin ya sayo wasu makamai da alburusai a garin Kaduna.

Kakakin Rundunar Sojan Najeriya ta daya, Liyutanal Kanar Musa Yahaya, ya bayyana a wata sanarwa a ranar Laraba cewa, daga bisani, sojojin sun bi sawun yaron tare da kama shi, daga bisani kuma suka yi amfani da su wajen kama wasu shugabannin ‘yan fashin guda biyu zuwa wurin da aka ware domin amsar alburusan.