Gwamnatin Tarayya Ta Kafa Kwamitin Da Zai Lalubo Hanyar Magance Tsadar Kayan Masarufi

Gwamnatin Tarayya ta kafa wani kwamiti mai karfi domin lalubo bakin zaren matsalolin da suka addabi bangaren farashin kayyakin masarufi na bukatun yau da gobe.

Ministar kasafin kudi, tsare-tsaren tattalin arziki, Hajiya Zainab Ahmed, ita ce ta sanar da hakan a ranar Laraba biyo bayan fitowa daga zaman Majalisar zartaswar Nijeriya da mataimakin shugaban kasa Farfesa Yemi Osinbajo ya jagoranta.

• Birnin Shanghai Ya Dawo Da Ayyukan Samar Da Kayayyaki Yadda Ya Kamata

Ministar tana mai cewa, kwamitin ya bada shawarar a gaggauta shawo kan Matsalolin da suke janyo tashin gauron zabi na kayan masarufi a fadin kasar nan.

Ministar ta ce an yi wa kwamitin bayani yadda abubuwa suka yi tashin gwauron-zabo da kuma yadda za a kawo karshen matsalar.