Gwamnatin tarayya ta umurci masu shagunan sayar da magunguna 1,321 da aka rufe a Kano da su koma cibiyar hada-hadar sayar da magunguna da ke unguwar dangwauro, domin tabbatar da sa ido kan harkokin sayar da magunguna da tsaron lafiyar jama’a.
Hukumar kula da ingancin abinci da magunguna ta kasa (NAFDAC) tare da hadin gwiwar hukumar magunguna ta Nijeriya (PCN), sun rufe shagunan a ranar 18 ga watan Fabrairu saboda gudanar da ayyukansu ba bisa ka’ida ba a Kano.
Ministan Lafiya, Farfesa Muhammad Ali-Pate ne ya bayar da wannan umarnin a lokacin da yake zantawa da manema labarai jim kadan bayan ziyartar cibiyar CWC a ranar Juma’a da ke Dangwauro, kan hanyar Zaria, Kano.
