Gwamnatin Tarayya Na Yunkurin Rage Dala Biliyan 1.5 Da Ake Kashewa Wajen Shigo Da Madara

A yayin da Nijeriya ke bikin ranar madara ta duniya na 2025, gwamnatin tarayya ta sanar da shirin rage sama da dala biliyan 1.5 da kasar ke kashewa a duk shekara daga shigo da madara da kuma bunkasa samar da nonon cikin gida.

Da yake magana a ranar Asabar a Abuja, ministan bunkasa harkokin kiwo, Idi Mukhtar Maiha, ya ce gwamnati na shirin ninka yawan nonon da Nijeriya ke samarwa a duk shekara daga tan 600,000 zuwa ton miliyan 1.2 cikin shekaru biyar masu zuwa.

• Wani Matashi Dan Shekara 33 Ya Rasu Bayan Ya Fada Wata Tsohuwar Rijiya A Kano
• Shugabannin Sin Da Amurka Sun Tattauna Ta Wayar Tarho

Bikin na bana shi ne irinsa na farko tun lokacin da Shugaban kasa Bola Tinubu ya kafa hukumar kula da kiwon dabbobi na tarayya a watan Yunin 2024, ministan ya ce, taron wata alama ce ta azama da himmar da suke da shi na inganta bangaren kiwo a fadin kasar nan.

“Muna shan akalla madara tan miliyan 1.7 a duk shekara, har yanzu kuma, muna samar da kaso 35 ne kawai na yawan abun da kasar ke bukata. Sauran, kusan na sama da dala biliyan 1.5, shigo da su ake yi, mafi yawanci a launin madaran gari,” Maiha ya shaida.

Ya yi nuni da cewa, yawan madarar da Nijeriya ke amfani da shi ya kai lita 8.7 kacal a kowace shekara, wanda ya yi kasa da yadda hukumar lafiya ta duniya ta bayar da shawarar lita 210, har ma da na Afirka na lita 40.

Domin shawo kan wannan matsalar, ministan ya zayyana kokarin da ake yi a karkashin dabarun bunkasa kiwon dabbobi na kasa, wanda ya mayar da hankali kan ginshikai guda 10 da suka hada da bunkasa kimar dabbobi, inganta kiwo, kiwon lafiyar dabbobi, samar da kudi, sauya salon kiwo da karfafawa matasa da mata gwiwa kan dogaro da kai.

Maiha ya yi tunin cewa zuwa yanzu ma’aikatar ta samu cimma wasu nasarori da suka hada da yin rajistar nau’in kiwo guda takwas, “na farko a cikin shekaru 48” da kuma samar da wani shiri na kasa kan albarkatun halittun dabbobi tare da hadin gwiwar FAO.

“Dabbobinmu na cikin gida suna samar da lita 1-2 na madara a kullun, idan aka kwatanta da na waje a karkashin gudanarwa da kuma tsarin kiwon lafiya domin shawo kan wanan gibin, dole ne mu tashi tsaye mu magance wannan matsalar,” ya shaida.

Ministan ya kuma bayyana yadda ake zuba jari a fannin kiwon lafiyar dabbobi, gami da fadada samar da alluran rigakafin a Cibiyar Nazarin Dabbobi ta Kasa (NBRI) daga allurai miliyan 120 zuwa miliyan 850 a duk shekara. An kuma kaddamar da wani wurin ajiyar alluran rigakafi mai amfani da hasken rana mai karfin awo miliyan 40 a Sheda da ke Abuja da dai sauran nasarori.