Gwamnatin Tarayya Ta Soke Faretin Ranar Dimokuraɗiyya, Tinubu Zai Yi Wa ‘Yan Ƙasa Jawabi 

Gwamnatin Tarayya ta soke faretin soja da aka saba yi a duk zagayowar ranar dimokuraɗiyya, wanda za a yi a gobe Alhamis, 12 ga watan Yuni, 2025, don bikin cikar Nijeriya shekaru 26 na dawowa mulkin dimokuraɗiyya.

Kwamitin Shirya Bikin Ranar Dimokuraɗiyyar ne, ya shaida haka yana mai cewa Shugaba Bola Tinubu zai yi jawabi ga al’ummar ƙasa kai-tsaye da misalin ƙarfe 7 na safe a ranar Alhamis, ba tare da faretin soja kamar yadda aka saba a baya ba, kan zai halarci zama na musamman na Majalisar Tarayya da misalin ƙarfe 12 na rana.

• A Bai Wa Kudu Tikitin Takara A 2027 Ko PDP Ta Ruguje – Wani Jigo A PDP
• Nijeriya Ta Fuskanci Cikas Wajen Karɓo Rancen Dala Biliyan 5 Daga Saudiyya

Yayin zaman, ana sa ran zai gabatar da jawabai kan halin da ƙasar nan ke ciki tare da nazari kan yadda dimokuraɗiyyar Nijeriya ke gudana, da kuma kira na musamman don haɗin kai wajen sake fasalin tsarin ƙasa.

Hakazalika, a yammacin ranar da misalin ƙarfe 4, za a gudanar da babban taron jawabi a Dandalin Taro na Fadar Shugaban Ƙasa da ke Abuja, inda za a tattauna kan ci gaban dimokuraɗiyya mai taken: “Ƙarfafa Nasarorin Dimokuraɗiyyar Nijeriya: Muhimmancin Sauye-sauyen Da Za Su Dore.”

An buƙaci jama’ar ƙasar nan da su saurari jawabin shugaban ƙasa da kuma bayar da tasu gudunmawar cikin tattaunawar kan yadda za a zurfafa ginshikan dimokuraɗiyya da sauye-sauye masu ma’ana.