Rahotanni sun bayyana cewa mutane biyu sun rasu yayin da aka ceto bakwai a wani hadarin kwale-kwale a karamar hukumar Miga da ke jihar Jigawa.
Jami’in hulda da jama’a na rundunar ‘yan sanda (PPRO) a jihar Jigawa, Lawan Shiisu Adam, ya ce hadarin ya afku ne a lokacin da manoma tara ke dawowa daga gonakinsu a Galauchime zuwa kauyen Sansani a karamar hukumar Miga.
Ya ce da isar manoman kogin, sai suka hau wani kwale-kwalen da wani mai suna Ado Dan Maguga yake tukawa amma abin takaici sai kwale-kwalen ya kife saboda ruwan sama da iska.
“An ceto mutane bakwai yayin da sauran biyun suka bata.
“Mutane biyun da aka samu gawarwakin su Imran Rabiu, dan shekara 12; da Tasiu Rabiu mai shekaru 14. An gano gawarwakinsu daga baya aka mika wa iyalansu domin yi musu jana’iza.”
