Harin Jirgin Kasa: Naira Miliyan 100 Ne Kudin Fansar Duk Mutum Daya —’Yan Ta’adda

‘Yan ta’addan da suka farmaki jirgin Kasan Abuja zuwa Kaduna sun bayyana cewa Naira Miliyan N100m ne kudin fansa kan duk mutum daya daga cikin fashinjojin jirgin da ke tsare a Wajensu su 43.

Jaridar Punch ta rahoto cewa, ‘yan ta’addan sun aike da sakon wannan bukatar ne ga iyalan Fasinjojin dake tsare a wurinsu a makon da ya gabata.

• Yadda ‘Yan Uwa Suka Biya Miliyan 800 Don Sakin Fasinjoji Jirgin Kasan Abuja-Kaduna

A ranar 28 ga watan Maris, 2022 ne ‘yan ta’addan suka kaima Jirgin Harin, inda suka kashe mutane da raunata wasu da dama kuma suka yi awon gaba da wasu 61.

‘yan ta’addan sun nemi gwamnatin tarayya ta saki kwamandojin su 15 dake tsare da ‘ya’yansu sannan kuma a hada musu da kudade masu yawa.

A ranar 12 ga watan Yuni, maharan suka sako mutum 11 yayin da wasu mutum Bakwai suka shaki iskar ‘yanci ranar Asabar da ta gabata.