Jami’an Tsaro Sun Yi Kwanton Bauna Sun Kashe ‘Yan Fashin Daji 10 A Kaduna

Jami’an tsaro a Nijeriya sun kashe ‘yan fashin daji takwas tare da ƙwace babura yayin wani samame da suka kai a yankin Chikun da Birnin Gwari na Jihar Kaduna, a cewar gwamnatin jihar.

BBC ta rawaito cewa, Kwamashinan Tsaro da Harkokin Cikin Gida na Kaduna Samuel Aruwan ya ce dakarun rundunar rundunar haɗin gwiwa na Operation Forest Sanity ne suka ƙaddamar wa ‘yan bindigar cikin sanarwar da ya fitar ranar Juma’a.

• Wutar Lantarki Ta Yi Sanadin Mutuwar Mutum 11 A Jihar Kaduna
  • ‘Yan Bindiga Sun Kashe Mutum 37 Tare Da Kone Gidaje Sama Da 100 A Garin Kaura, Kaduna

“Dakarun sun gwabza da ‘yan fashin kuma suka kashe takwas daga cikinsu, sannan suka ƙwace babura huɗu da wayoyin hannu a samamen farko,” in ji shi.

Jami’an tsaron sun sake karawa da ‘yan bindigar a karo na biyu kuma suka ƙwace babur biyu.

A gefe guda kuma, dakarun sun yi nasarar kashe wasu ‘yan fashi biyu a yankin Sabon Birni da Maidaro da Dogon Dawa, duka a Jihar ta Kaduna.

A wannan karon ma, jami’an tsaro sun ƙwace bindiga ƙirar AK-47 da kuma harsasai da dama.