Kante Ya Yarda Ya Koma Saudiya Da Taka Leda

Dan wasan tsakiya na kungiyar kwallon kafa ta Chelsea Ngolo Kante ya amince zai koma kungiyar Al Ittihad ta kasar Saudi Arabia da taka Leda.

Kante wanda ya lashe Firimiya lig a Leicester City kuma ya lashe ta biyu a Chelsea ya yarda zai koma taka leda a Saudiya a kan wani babban tayi da suka masa na Yuro miliyan 86.

Kante ya taimaka wa kasarsa ta Faransa lashe gasar kofin Duniya da aka buga a kasar Rasha a Shekarar 2018.

Ngolo Kante ya taba lashe kyautar gwarzon dan wasa ta ‘Football Writers Association Player Of The Season a shekarar 2016’.

• Ronaldo Ya Kafa Tarihin Zama Ɗan Wasan Da Ya Fi Kowa Buga Wasannin Ƙasa Da Ƙasa

Dan shekaru 32 Kante ya lashe Uefa Champions League,Premier League,Europa League da kuma FA Cup a tsawon shekarun da yayi a Stamford Bridge.

Idan Kante ya koma Al Ittihad zai hadu da abokin wasansa na kasar Faransa Karim Benzema da kuma sauran ‘yan wasa da suka dade da komawa Saudiya ciki har da Cristiano Ronaldo da ke kwallo a kungiyar Al Nassr.