Mahara Sun Kashe Wani Mutum A Kankia, Jihar Katsina

Wasu ‘Yan bindiga sun kashe wani mutum mai suna Ibrahim Abdullahi a karamar hukumar Kankia da ke jihar Katsina.

Mutumin wanda mutanen yankin suka fi kiransa da Solo, an kashe shi ne da yammacin ranar Asabar, kakakin rundunar ‘yan sandan jihar Katsina, ASP. Abubakar Aliyu, ya tabbatar da faruwar lamarin a Katsina ranar Lahadi.

• ‘Yan Bindiga Sun Kashe Dan Sintiri, Sun Yi Wa Mata Fyade A Katsina
• Dan Bindiga Ya Shiga Hannu, Ya Bayyana Yadda Ya Kashe Mutum 15 A Katsina

Aliyu ya ce rundunar ‘yan sandan ta fara gudanar da bincike kan kisan, wanda shi ne na baya-bayan nan a jihar da aka fuskanci hare-haren ta’addanci.

Lamarin ya faru ne da misalin karfe 8:40 na dare, a lokacin da ‘yan bindigar suka kai farmaki wani gida mai kusa da babban asibitin Kankia.

Wani mazaunin unguwar wanda ya bayyana cewa ‘yan bindigar da suka zo kan babura, sun kai farmaki cikin yankin inda suka harbi Abdullahi a lokacin da ya yi kokarin yi musu tambayoyi.

An ce ‘yan ta’addan sun gudu ne bayan sun harbe Abdulahi kuma suka bar shi jina-jina.

Lamarin da ya tilasta wa ’yan kasuwa da mazauna yankin da masu wucewa a kan hanyar Katsina zuwa Kano gudun tsira da rayukansu a lokacin da rahotonni ke tabbatar da Abdullahi ya rasu.

Idan dai ba a manta ba a daren jiya ma wasu ‘yan bindigar sun kai hari a cikin wasu gidaje, inda suka yi garkuwa da mutum daya, wanda har yanzu yake hannunsu.