Majalisar Dokokin Jihar Katsina ta bayyana Gwamnan Jihar Katsina, Malam Dikko Umar Radda a matsayin dan Takara daya tilo a zaben 2027 a jam’iyyar APC.
Da yake bayyana matsayar majalisar a madadin sauran ‘yan majalisar dokokin 34, shugaban majalisar, Hon. Nasiru Yahaya Daura ya ce sun dauki matakin ne saboda dalilai da dama.
- Wakilin Sin Ya Soki Yadda Amurka Ke Tafiyar Da Kudurin Takunkuman Sudan Ta Kudu
- Zulum Ya Ba Da Tallafin Karatu Ga Mata ‘Yan Asalin Jihar Da Suka Samu Maki 250 A JAMB
Ya ce daga cikin dalilan sun hada da cewa, sun yi haka ne domin kishin al’ummar da suke wakilta tare da sake ba gwamnan dama a karo na biyu.
A cewarsa, irin ayyukan ci gaba da wannan gwamnati ta kawo a cikin shekaru biyu da hawa mulki sun isa hujja a sake mara wa Radda baya domin ya ci gaba da irin wadannan ayyuka.
Ya kara da cewa gwamnatin Radda ta yi namijin kokari wajen samar da takin zamani da hanyoyi da kuma ba da tallafi domin ci gaban al’ummar Jihar Katsina.
Hon. Nasiru ya kara da cewa Gwamna Radda ya yi kokari wajen yaki da matsalolin tsaro wanda suka addabi Jihar Katsina, inda ya bayyana cewa ana samun sauki sosai a wannan bangare.
Ya ce gwamnati ta gyara makarantu da asibitoci a fadin Jihar Katsina, inda aka maida su na zamani tare da daukar ma’aikatan lafiya da kuma malaman makaranta da yawansu ya kai 7,000, wanda ya ce ko haka aka tsaye suna da hujja da dalilin mara masa baya.
Idan za a iya tunawa a makon da ya gabata ne, ‘yan majalisun tarayya guda 15 dukkansu na jam’iyyar APC suka ayyana Gwamna Radda a matsayin wanda za su goya baya a zaben 2027.
Sai dai kuma ana dora ayar tambaya kan wadannan ‘yan majalisu da cewa sun yi riga Malam Masallaci, domin kafin su yanke irin wannan hukunci ya kamata su tuntubi wadanda suke wakilta domin gudun tutsu ranar zabe.
Yanzu dai abin jira a gani shi ne, Gwamna Radda zai maida biki, ma’ana dai shi ma ya amince kowane dan majalisa ya dawo kujerarsa ba tare da hammaya ba? Lokaci alkali!
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
