Dakarun sojojin saman Nijeriya da aka tura garin Durbunde da ke karamar hukumar Takai a jihar Kano sun kama wani fitaccen kwamandan masu garkuwa da mutane da aka fi sani da Isah Abdul mai shekaru 35.
An gudanar da samamen ne a ranar 19 ga watan Fabrairun 2024 da misalin karfe 6:30 na yamma, a wani shiri na hadin gwiwa, biyo bayan sahihan bayanan sirri game da maboyar fitaccen mai garkuwa da mutane da yaransa wadanda suka addabi mazauna yankin.
Binciken farko ya nuna cewa, Isah Abdul da yaransa ne suka yi garkuwa da wani Yakubu Ibrahim Tagaho, wanda aka fi sani da Sarkin Noman Gaya, a ranar 6 ga Afrilu, 2023, daga gidansa da ke kauyen Tagaho a karamar hukumar Takai. Sai da ya shafe wata guda a hannunsu kafin su sako shi bayan an biya kudin fansa Naira Miliyan 30.
