NDLEA Ta Cafke ‘Yar Shekara 60 Da Mace Mai Juna-biyu Cikin Masu Harkallar Sayar Da Kwaya

Wata goggo mai shekaru 60 da wata mace mai juna-biyu na daga cikin wadanda aka kama a lokacin da ake gudanar da bincike inda jami’an hukumar hana sha da fataucin miyagun kwayoyi ta kasa suka kwato kilogiram 5,527.15 na methamphetamine da tabar wiwi, da katan-katan na kwayar tramadol 132,090 da kwalaben kodin (codeine) 2,000 a fadin jihohi biyar da babban birnin tarayya, Abuja a cikin makon da ya gabata.

An kama goggon ne mai suna Misis Ibinosun Sandra Esther a garin Ibadan na jihar Oyo a wani samame da aka kai musu biyo bayan kama wani nau’in tabar wiwi mai nauyin kilogiram 5.5 da aka shigo da su kasar daga Afirka ta Kudu.

• NDLEA Ta Yi Nasarar Cafke Wani Shugaban Masu Safarar Kwaya Da Take Nema Ruwa A Jallo

Kayan da ta yi ikirarin cewa ‘yarta ce ta aiko mata da su wanda aka boye su cikin wasu manya-manyan kayan sauti guda biyu ta hanyar NAHCO da ke filin jirgin saman Murtala Muhammed da ke Ikeja Legas a cikin jirgin Airpeace Airline.

A wani labarin kuma, jami’an NDLEA a ranar Asabar 26 ga watan Nuwamba sun kama kilogiram 1.4 na methamphetamine da aka boye a cikin kayan abinci da kayan kwalliya da za a kai su kasar Brazil a jirgin Qatar Airways.