A kalla mutane bakwai ne suka rigamu zuwa gidan gaskiya sakamakon barnar da ambaliyar ruwa ta yi a sassan daban-daban na jihar Kwara a wannan shekarar.
Kusan kowace shekara dai sai an samu ambaliyar ruwa a kogunan da ke kauyukan karamar hukumar Patigi.
Adadin gidaje 1,300 da mutane 2,800 ne ambaliyar ta shafa tare da lalata gonakai daban-daban a Patigi.
Manajan gudanarwa na HYPPADEC, Alhaji Abubakar Yelwa, shine ya shaida hakan a ranar Lahadi a Patigi da ke jihar Kwara.
Yelwa wadda ke bayanin lokacin da ya kaddamar da raba kayan tallafin rage radadin da ya kai na miliyan 50 ga wadanda ambaliyar ta shafa a jihar.
Daga cikin kayayyakin tallafin da ya rabar har da kayan abinci buhu 500, katon-katon na sabulu, katihu 1,300, sinadarin wanki da sauran kayan amfanin yau da kullum.
Da yake samun wakilcin Mahmud Muhammed, Yelwa ya gargadi wadanda suke rayuwa a kusa da kuguna da su tashi domin kiyaye kawukansu daga ambaliyar.
Daya daga cikin wadanda suka amfana da tallafin, Mohammed Garba, ya ce ya rasa gonansa da amfanin gonar na shinkafa da ya zarce kadada 1, ya nuna damuwarsa kan halin da suke ciki.
Daga bisani ya gode wa Yelwa bisa wannan tallafin da ya kawo musu tare da kiran wasu ma da cewa su yi hakan domin taimakon wadanda suka shiga mawuyacin hali sakamakon ambaliyar.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
