Shekaru 25 Da Dawowar Macao: Nasarori Da Hangen Gaba

Rubu’in karni ke nan da dawowar Macao cikin kasarsa ta asali, hakan ya kasance wani muhimmin ci gaba a cikin babbar tafiyar farfado da al’ummar kasar Sin. Tun daga wannan lokacin, ta hanyar bin manufar “kasa daya, tsarin mulki biyu”, Macao ya samu sauyi mai ban mamaki, godiya ga nasarorin da aka samu a sassa daban-daban, kama daga bangaren siyasa, tattalin arziki da zamantakewa zuwa al’adu. A gun taron murnar zagayowar wannan rana da bikin kaddamar da wa’adi na shida na gwamnatin yankin musamman na Macao a ranar 20 ga watan Disamba, shugaban kasar Sin Xi Jinping ya yaba da wadannan nasarori da aka samu, kuma ya bayyana babbar fata ga wannan yankin na musamman na kasar Sin, ta mahangar ci gaban kasa.

Tun bayan dawowarsa, Macao ya samu karuwar tattalin arziki mai matukar daukar hankali. Alal misali, a rabin farko na shekarar 2024, GDPn Macao ya kai kusan biliyan 204 na kudin Macao wato MOP, kusan dala biliyan 25.5. Yayin da a shekara 1999, kafin dawowar, GDPn ya kasance MOP biliyan 51.9, kimanin dala biliyan 6.48. Har ila yau, kafin 1999, Macao yana da karancin albarkatun ilimi, mazauna kalilan ne ke zuwa jami’a. A yau, jimillar yawan shigar daliban yankin manyan makarantu ya haura kashi 95 cikin dari. Kana yawan jami’o’i a Macao ya karu daga jami’a guda zuwa 10, wadanda ke taka muhimmiyar rawa wajen raya tarin hazaka masu muhimmanci don ci gaban Macao. Hakazalika, shugaba Xi ya yaba wa tsarin mulkin da ya shafi jama’ar Macao, inda ya bayyana irin ci gaban da aka samu a fannin ayyukan yi, da gidaje, da ilimi, da kiwon lafiya, da tsaro, da sauran shirye-shiryen zamantakewar al’umma. Wannan cikakkiyar hanya ta haifar da zaman lafiya da kwanciyar hankali na dogon lokaci.

Dangane da hangen gaba kuwa, Macao zai ci gaba da sa kaimi ga kara kyautata mu’amala tsakaninta da mazauna yankin a bangaren kiyaye ka’idoji da dokoki, da jagorantar ci gaban kungiyoyi, da inganta tushen ginshikin gudanar da tsarin mulki, ta hanyar kara inganta tsarin da ya shafi jama’a, da gaggauta magance matsaloli da suka shafi jama’a, da samar da yanayi mai kyau na zamantakewa, da kuma tabbatar da burin mazauna yankin na samun ingantacciyar rayuwa. Bugu da kari, zai ci gaba da inganta damammaki ga duk ma’aikata masu basira, da mayar da hankali kan magance bukatun matasa, da samar da daidaito na zamantakewa, adalci, jituwa, da kwanciyar hankali. (Mohammed Yahaya)