Shugaban CMG Ya Zanta Da Manyan Jami’an IOC

Shugaban babban rukunnin gidajen radiyo da talibijin na kasar Sin wato CMG Shen Haixiong, ya tattauna da shugaba mai girmamawa a duk tsawon rayuwa na kwamitin shirya gasar Olympics ta kasa da kasa wato IOC mai barin gado mista Thomas Bach, da sabuwar shugabar IOCn uwargida Kirsty Coventry, a birnin Lausanne dake kudu maso yammacin kasar Switzerland. An yi ganawar ne a jiya Litinin, bayan bikin mika ragamar shugabancin IOC da ya gudana bisa gayyatar da aka yiwa shugaban na CMG.

Yayin zantawar tasu, Shen ya ce karkashin jagorancin Mista Bach a shekarun baya-bayan nan, CMG da IOC sun kai ga cimma nasarori da dama a bangaren kulla yarjeniyoyin hakkin mallaka da watsa shirye-shiryen wasanni, da samar da sakwanni, da mu’amalar al’adu da sauransu, matakin da ya zurfafa huldar abota tsakaninsu. Ya ce a matsayin kafar yada labarai daya tilo dake sarrafa sakwanni bisa fasahar 8K yayin gasar Olympics ta Millan dake tafe a shekarar 2026, CMG na fatan jama’ar duniya za su nishandantu da wannan gasa ta lokacin hunturu karkashin jagorancin Coventry.

• Xi Jinping Zai Halarci Bikin Tunawa Da Cika Shekaru 80 Da Cimma Nasarar Yakin Kin Jinin Harin Sojojin Japan Da Yakin Kin Tafarkin Murdiya
• Za A Gudanar Da Taron Dandalin Davos Na Lokacin Zafi Karo Na 16 a Birnin Tianjin Na Sin

Shen ya kuma kara da cewa, CMG tana fatan kara hadin kai da IOC ta fuskar watsa labaran wasannin motsa jiki bisa fasahar AI, da ma bangaren wasan motsa jiki na yanar gizo da sauransu, ta yadda za su yayata ruhin Olympics a dukkanin fannoni.

A nasa bangaren, Mista Bach ya jinjinawa gagarumar gudunmawar da CMG ta dade tana baiwa IOC, yana mai fatan za su kara zurfafa hadin gwiwarsu a nan gaba, ta yadda za su taka rawar gani wajen tabbatar da dunkulewar duniya.

Kazalika, a nata bangare, Madam Coventry ta bayyana cewa, tana fatan zurfafa hadin gwiwa da CMG bisa tushen cimma moriyar juna, da samun nasara tare, don daga bunkasar wasannin Olympics zuwa wani sabon matsayi mafi inganci. (Amina Xu)