Shugabannin Sin Da Congo (Kinshasa) Sun Aike Wa Juna Sakon Murnar Cika Shekaru 50 Da Dora Huldar Kasashen Biyu Kan Hanyar Da Ta Dace

Yau Alhamis ne shugaba Xi Jinping na kasar Sin, da takwaransa na kasar Congo(Kinshasa) Félix-Antoine Tshisekedi Tshilombo, suka aikewa juna sakon murnar cika shekaru 50 da dora huldar da ke tsakanin kasashen 2 kan hanyar da ta dace. 

A cikin sakonsa, Xi ya nuna cewa, a rabin karnin da ya gabata, kasashen 2 sun raya hulda a tsakaninsu yadda ya kamata, sun kuma rika zurfafa dankon zumunci a tsakaninsu.

• Kasar Sin Ta Yi Kira Da A Karfafa Hadin Gwiwa Domin Magance Fashin Teku A Gabar Tekun Guinea

A shekarun baya, kasashen biyu sun kafa huldar abokantaka bisa manyan tsare-tsare, kuma hadin gwiwarsu ya haifar da sakamako mai yawa, kuma hakan ya amfani al’ummomin kasashen biyu.

Xi ya kara da cewa, yana dora muhimmanci kan raya dangantaka a tsakanin kasar Sin da kasar Congo(Kinshasa), yana kuma son yin kokari tare da shugaba Félix-Antoine Tshisekedi Tshilombo, wajen yin amfani da damar cika shekaru 50 da dora huldar kasashen biyu a kan hanyar da ta dace, domin zurfafa amincewar juna ta fuskar siyasa, da inganta hadin gwiwarsu a fannin aiwatar da shawarar “ziri daya da hanya daya”, da kuma bude sabon babi na bunkasar huldar da ke tsakanin kasashen biyu.

A nasa bangaren, Félix-Antoine Tshisekedi Tshilombo ya ce, a cikin shekaru 50 da suka wuce, kasarsa da Sin sun bunkasa hulda a tsakaninsu yadda ya kamata ba tare da kasala ba.

Yana kuma fatan kara zurfafa dankon zumunci a tsakanin kasashen biyu, da kara azama kan samun sabbin sakamako wajen bunkasar huldar abokantaka a tsakanin kasashen biyu bisa manyan tsare-tsare, a kokarin kawo wa jama’ar kasashen biyu alheri. (Tasallah Yuan)