Sin Ta Soki Lamirin Amurka Dangane Da Wanke Japan Daga Laifukan Da Ta Tafka Yayin Yakin Duniya Na Biyu

Kakakin ma’aikatar tsaron kasar Sin Jiang Bin, ya soki lamirin kasar Amurka, dangane da yadda ta wanke Japan daga laifukan da ta tafka, yayin yakin duniya na biyu. Jiang Bin, wanda ya yi sukan a Juma’ar nan, ya kira hakan a matsayin mummunan karan-tsaye ga ainihin abun da ya auku a tarihi, kana tozarta damuwar wadanda mamayar dakarun Japan ta cutar.

Jami’in ya yi tsokacin ne a matsayin martani ga sanarwar da ma’aikatar harkokin wajen Amurka ta fitar, inda ta ce, bana shekaru 80 ke nan, bayan da Amurka da Japan suka kawo karshen yaki a yankin tekun Pacific. To sai dai kuma a ta bakin Jiang Bin, yayin yakin duniya na biyu, dakarun Japan ‘yan mamaya sun aikata muggan laifuka, tare da muzgunawa al’ummun sassan duniya daban daban, ciki har da na Amurka. Amma abun mamaki sai ga shi a yanzu bangaren Amurka ya manta da hakan.

Don haka dai Sin na kira ga Amurka da ta yi watsi da dabarun siyasar yankuna, ta martaba abubuwan da suka wakana a tarihi yayin yakin duniya na biyu, kana ta hada hannu da sassan kasa da kasa, wajen kare tsarin cudanyar sassan duniya bayan shudewar yakin duniya na biyu. (Saminu Alhassan)