Hedikwatar tsaro ta kasa ta bayyana cewa, dakarun soji na Operation Hadarin Daji sun fatattaki wasu ‘yan bindigan daji da suka kai ma wa wasu manoma hari a yayin da suke kwashe amfanin gonakan su a kauyen ‘Yar Tasha da ke karamar hukumar Maru a jihar Zamfara.
Hakan na kunshe ne a cikin sanarwar da Daraktan yada labarai na hedikwatar, Majo Janar Musa Danmadami ya fitar, inda ya ce, dakarun sun samu wannan nasarar ce a ranar 6 ga watan Nuwambar 2022 inda suka samu nasarar kashe Kasurgumin dan bindiga mai suna Bada.
Danmadami ya kara da cewa, Bada ya kai harin ne a kauyen ‘Yar Tasha, inda ya hallaka wasu manoma a ranar 13 ga watan Oktoban 2022.
Bugu da kari, dakarun sun kuma samu nasarar kwato babur daya da makamai da kuma sauran wasu kayan masarufi.
A wani bangare kuma, dakarun sun kuma sake fatattakar wasu ‘yan bindigar daji da suka kai wani hari a kauyen Gamraki da ke a cikin garin Kwatarkwashi a karamar hukumar Bungudu ta jihar Zamafara.
Ya ce, dakarun sun fafata da ‘yan bindigar, inda suka samu nasarar kubutar da wasu mutum biyu da akayi garkuwa da su, sun kashe wani dan bindiga yayin da sauran Kuma suka arce dauke da harbin albarusai.
Ya ce, dakarun sun kuma kwace bindiga kirar AK 47 da kwabsar albarusai da sauransu.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
