Dakarun ‘Operation Forest Sanity’ tare da hadin guiwar hedkwatar tsaro a ranar Juma’a sun kashe ‘yan ta’adda shida tare da kwato makamai da alburusai a wani samame da suka yi a boye.
A wata sanarwa da daraktan hulda da manema labarai na rundunar, Manjo Janar Musa Danmadami, ya fitar, ya ce sojojin sun kai farmakin ne a asirce a kauyukan Maidaro da ke karamar hukumar Giwa a jihar Kaduna.
- Sojoji Sun Kashe ‘Yan Ta’adda 3, Sun Kwato Makamai A Kaduna
- Sojoji Sun Ceto Mutane 6 Da Aka Yi Garkuwa Da Su A Kaduna
Ya ce a wani artabu da suka yi da ‘yan ta’addar, sojojin sun yi nasarar kashe ‘yan ta’adda 6 tare da kwato bindigu kirar AK 47 guda biyar, harsasai na musamman 192 7.62 x 39 mm, harsasai 74 da wasu karin harsasai na musamman 7.62 x 54mm da AK 47 guda tara da babura uku da sauran abubuwa daban-daban.
Babban hafsan sojin ya yabawa sojojin tare da yin kira ga jama’a da su baiwa sojoji bayanai masu inganci kuma akan lokaci kan ‘yan ta’adda da duk wasu masu ayyukan ta’addanci a yankinsu.
