Ministan harkokin wajen kasar Sin kuma mamba a ofishin siyasa na kwamitin kolin JKS, Wang Yi, ya tattauna da ministan harkokin wajen Iran, Misa Araghchi, a yau Asabar 28 ga Disamba, a birnin Beijing.
A yayin tattaunawar, Wang Yi ya bayyana cewa ya kamata kasar Sin da Iran su yi aiki kafada da kafada wajen kara ingancin amfani da “Gawurtaccen hadin gwiwar BRICS” da kuma kula da muradun kasashe masu tasowa. Ya kuma kara da cewa, a yanayi na rashin tabbas da ake kaka-ni-ka-yi a ciki a duniyar yau, ya dace kasashen duniya su kafe kai-da-fata da nuna amannar cewa, babu mai iya zama karfen kafa ga batun hadakar kasashe na duniya, da dunkulewar tattalin arziki da amfani da wayewar kai da al’adu mabambanta.
A nasa bangaren, Mista Araghchi ya ce kokarin zurfafa tsararren cikakken hadin gwiwa a tsakanin Iran da Sin ya kasance wata alkibla mai muhimmanci da ake fuskanta a karkashin manufofin harkokin wajen Iran.
Kasashen biyu dai sun kuma nuna amincewarsu da cewa, yankin Gabas ta Tsakiya yanki ne na mutanen Gabas ta Tsakiya, amma ba fagen yaki da manyan kasashe suke wasan kura a ciki ba, kuma bai kamata yankin ya zama dandalin gasar neman fada-a-ji da tayar da husuma a tsakanin kasashen da ke wajen yankin ba. (Mai fassara: Abdulrazaq Yahuza Jere)
