Wasu ‘yan bindiga dadi sun kashe daya daga cikin kubutattun Fasinjojin Jirgin Kasan Kaduna zuwa Abuja da suka samu ‘yancinsu a makon jiya a kan babban hanyar Funtua zuwa Gusau yayin da ke kan hanyar ta komawa garinsu a jihar Kebbi a ranar Asabar.
Wanda lamarin ya rutsa da shi ba a bayyana sunansa ba har zuwa yanzu, yana daga cikin wadanda suka shafe tsawon watanni shida a hannun masu garkuwa da mutane tun lokacin da suka yi garkuwa da su a ranar 28 ga watan Maris na 2022.
An kasheshi ne a hanyarsa ta komawa garinsu a jihar Kebbi tare da makusantansa da ahlinsa bayan da suka sake haduwa biyo bayan mika musu shi da Gwamnatin jihar Kaduna ta yi bayan da suka samu kubuta a makon da ta wuce.
‘Yan bindigan sun kasheshi bayan da ‘yan Boko Haram sashin Ansarul suka sakeshi da sauran karashin mutanen da suka sace na tsawon kwanaki 190.
LEADERSHIP ta gano cewa daya daga cikin makusantan marigayin da ke tuka motar an yi garkuwa da shi zuwa wani wajen da har zuwa yanzu ba a sani ba bayan da ‘yan bindigan suka farmakesu.
Sannan mamacin an kuma gano cewa ‘yan bindigan sun harbeshi ne a tsakar Ka a kan hanyar Funtua zuwa Gusau kuma ya mutu ‘yan awanni bayan da aka hanzarta kaisa babban asibitin Tsaye.
Tunin dai aka yi masa Jana’iza a garinsu kamar yadda addinin musulunci ya tanadar.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
