Shafa man bilicin don kara haske ko farin fata, abu ne da za a iya cewa; ya zama ruwan dare, musamman ga ‘yan Afirka ko bakar fata.
Wasu da dama suna amfani da man ne da niyyar fatarsu ta yi haske ko fari, yayin da wasu kuma ke amfani da shi cikin rashin sani, musamman yadda da yawan mutane ba su damu da sinadaran da ke cikin man da suke amfani ko shafawa ba.
- An Daure ‘Yan Nijeriya Uku Shekaru 15 A Bisa Laifin Zamba A Indiya
- Wang Yi Ya Nanata Matsayin Taiwan Yayin Tattaunawa Da Takwaransa Na Faransa
Man bilicin, yana aiki ne a fata wajen rage samar da tawadar rinin fata, wato ‘melanin’ da yaren likitanci. Tawadar rinin fata, ita ce ke samar da launin fatar mutum. Sannan kuma, wannan tawada ce ke kare fatar mutum daga kaifin hasken ‘ultrabiolet radiation’, wanda ke zuwa cikin hasken rana, wanda wannan haske ne mai hadari da ke iya haddasa kansa ko dajin fata.
Har ila yau, ana amfani da man bilicin, domin haska ko kodar da wani kebabbin sashin jiki kamar; nankarwa, bakin tabo, digon baki, tabbura-tabbura (tawadar Allah) da saura makamatansu, domin sajewa da jiki. Sai dai, wasu kuma suna amfani da man bilicin din ne, domin sauya launin fatarsu baki-daya.
Likitoci da sauran masana kiwon lafiya, suna ta jan hankalin mutane, domin su gane hadarin amfani da man bilicin, tsawon lokaci. Hadarin yana zuwa ne, sakamakon wasu muggan sinadarai da ke kunshe cikin man bilicin din. Kazalika, wadannan sinadarai, na yin mummunan lahani ga sassan jiki daban-daban.
Daga cikin sinadaran akwai:
‘Hydrokuinone, corticosteroids/hydrocortisone, Mercury’ ko kuma sunaye kamar haka: ‘calomel, mercuric, mercurous, ko mercurio’.
Idan mutum ya duba takardar da ke like a jikin mazubin man da ya siya, domin ganin bayanan sinadaran da ya kunsa, zai ga wadannan a jiki.
A kula, kada a sake a zabi duk wani man shafawar da ke dauke da daya daga cikin sinadaran da aka ambata a sama.
Daga cikin haduran amfani da wadannan sinadarai sun hada da:
1- Kodewar fata tare da bayyanar launin shudi-shudi ko kore-kore a fata.
2. Saurin tsufa ko yanƙwanewar fata.
3. Sirancewar fata, wato kaurin fata zai rika raguwa sannu a hankali.
4. Bayyanar jijiyoyin jini a kasan fata, wadanda da ba a iya ganin su.
5- Haifar da cutar Kansa ko dajin fata.
6- Tabin kwakwalwa ko tabin hankali kai tsaye.
7- Ciwon Koda: ‘Mercury’, mugun sinadari ne da ya yi kaurin suna wajen haddasa ciwon koda, saboda yadda yake lalata jijiyoyin jinin kodar baki-daya.
8- Ciwon hanta da matsalar jijiyoyin laka baki-daya.
9- Haifar jarirai masu tawaya, idan an yi amfani da man bilicin yayin goyon ciki.
Tuni hukumomi a Kasashen Ingila da Amurka suka haramta siyar da man shafawa da ke dauke da irin wadannan sinadarai, saboda hadarin da suke da shi ga lafiya. Sai dai, har yanzu, kasuwar ire-iren wadannan mayuka na ci gaba da ci a sauran kasashen duniya duk kuwa da kwarmata hadarinsu ga lafiyar da ake yi.
Idan kana ko kina da sha’awar amfani da man bilicin ko kuma damuwa game da yanayin fatarka ko fatarkiki, tuntubi likitan fata kafin fara amfani da duk wani irin nau’in man bilicin.
