‘Yan bindiga sun harbe manoma biyu tare da raunata wasu kan kin biyansu haraji.
Wadanda ‘yan bindigar suka harbe, akwai Alhaji Yahaya Shuwaka da Fadaman Gaude, inda kuma wadanda aka raunata, an kai su wani Asibitin da ke a yankin don duba lafiyarsu.
Lamarin ya afku ne a karamar hukumar Birnin Gwari da ke a jihar Kaduna.
‘Yan bindigar sun kai harin ne a kauyukan Shuwaka, Unguwan Bagudu da kuma Sabon layi da misalin karfe 11:30 na safe yayin da akasarin mazauna kauyen ke aiki a gonakansu.
Wasu daga cikin mazauna yankin sun bayyana cewa, an kai musu harin ne sabida mutanen sun ki biyan harajin da ’yan bindigar suka kakaba musu har wa’adin da suka gindaya musu wa ya cika.
Shugaban kungiyar ci gaban masarautar Birnin Gwari Ishak Kasai, ya tabbatar da faruwar lamarin.
An rahoto cewa, ’Yan bindigar dai, sun sanya wa manoman yankin harajin Naira miliyan 10 inda wa’adin biyan kudin zai kare a ranar 30 ga watan da ya gabata.
An ruwaito cewa, wannan harin shi ne karo na biyu da maharan suka kai farmaki yankin a cikin makon nan.
Rundunar ’yansanda ta jihar ba ta fitar da wata sanarwa ba kan wannan lamarin ya zuwa lokacin wannan rahoton.
