A daren Litinin din nan ne wasu ‘yan bindiga da ba a san adadinsu ba suka sake afkawa garin Jere da ke Karamar Hukumar Kagarko ta Jihar Kaduna inda suka yi awon gaba da wasu mutane.
Majiyarmu daga garin na Jere ta tabbatar da cewa ‘yan bindigar sun yi awon gaba da wani magidanci mai suna Hussaini tare da matarsa da ake kira da Hajiyale da ke gidan tsohon Sarkin Jere, marigayi Dakta Sa’ad Usman. Sai dai daga bisani matar ta kubuta.
Har ila yau majiyar ta kara da cewa, ‘yan bindigar sun kuma nausawa Unguwar Salanke, inda suka yi gaba da wani dattijo mai suna Baba Na’ibi Gayya bayan sun harbe wasu jikokinsa biyu, Ahmad da Musa a hannu.
Haka nan akwai wani matashi mai suna Haruna daga Unguwar Iya wanda shi ma ‘yan bindigar sun tafi da shi.
Zuwa rubuta wannan labarin dai ba a san adadin mutanen da aka sace ba. Yayin da garin na Jere wanda aka yi bikin nadin sabon sarkinsa a ranar 23 ga Disambar nan da ta gabata ke ci gaba da alhinin abin da ya faru.
Wannan shi ne karo na biyar da ‘yan bindiga ke shiga garin na Jere suna sace mutane suna garkuwa da su domin neman kudin fansa.
