Za A Fara Aiwatar Da Shirin Bai Wa Dalibai Lamunin Karatu A Watan Satumba 

Gwamnatin Tarayya ta bayyana cewa, ta na shirin fara aiwatar da lamunin dalibai a watan Satumba ko Oktoban 2023.

Babban sakataren ma’aikatar ilimi ta tarayya, Andrew David Adejo ne ya bayyana hakan a Abuja a ranar Laraba yayin da yake zantawa da manema labarai kan kudirin dokar da shugaban kasa Bola Tinubu ya sanya wa hannu a kwanakin baya.

• Dalibai Sun Bukaci Tinubu Da Gwamnoni Da Su Kula Da Sha’anin Tsaro, Ilimi Da Wutar Lantarki

Shugaba Tinubu ya amince da kudirin lamunin dalibai domin cika alkawarin da ya dauka a lokacin yakin neman zabe.

Kudirin lamuni ga dalibai wanda shugaban majalisar wakilai ta 9, Femi Gbajabiamila ya jagoranta, ya tanadi lamuni marar ruwa ga daliban Nijeriya marasa galihu.

Dokar dai a takaice, ita ce samar da hanyoyin samun ilimi mai sauki ga ‘yan Nijeriya marasa galihu ta hanyar bayar da lamuni mara ruwa daga asusun lamuni na ilimi na Nijeriya, in ji babban sakataren.