Zababben shugaban kasa, Asiwaju Bola Ahmed Tinubu, ya bukaci ‘yan Nijeriya musamman jam’iyyun adawa da su bizne siyasa da sauran sabani da aka samu don yin aiki tare da shi wajen gina kasa mai girma, yana mai cewa zuciyarsa a bude take ga kowa.
Da yake jawabi bayan shi da mataimakinsa, Sanata Kashim Shettima, sun karbi takardar shaidar cin zabe daga hukumar zabe mai zaman kanta ta kasa (INEC), da yammacin Laraba, Tinubu ya ce dole ne akwada siyasa domin samun damar gina kasa.
Tinubu ya ce, bai kamata a kalli nasarar da ya samu a matsayin tasa kadai ba, ya jaddada cewa, idan ana son samun ci gaba dole ne dukkan ‘yan kasa su tashi tsaye su hada kai domin yaki da kalubalen da ke gabanmu.
Zababben shugaban kasar ya godewa magoya bayansa ya kuma yi kira na musamman ga sauran ‘yan Nijeriya da dan takararsu basu samu nasara ba a wannan karon da su zama masu kishin kasa, kar su manta su ma cikakkun ‘yan Nijeriya ne.
