Zulum Ya Ayyana Dokar Ta Baci Kan ‘Yan Dabar Maliyans A Maiduguri 

Gwamnan jihar Borno Babagana Zulum, ya umarci jami’in tsaro da ke jihar da su kame tsagerun matasan ‘yan sara-suka da akafi Sani da “Maliyans” da ke addabar mazauna garin Maiduguri da Jere da ke cikin birnin jihar. 

Maliyans wanda akasarinsu matasa ne, sun kasance masu ta’ammuli da miyagun kwayoyi, kuma sun yi kaurin suna wajen aikata manyan laifuka kamar fashi da makami da sauran ayyukan ta’addanci ciki har da hallaka wasu jami’an tsaro.

• Zulum Ya Nada Fannami A Matsayin Shugaban Ma’aikatan Borno

Zulum ya bayar da wannan umarnin ne a jiya Laraba, jim kadan bayan kammala taron gaggawa da majalisar tsaro ta jihar a fadar gidan gwamnati da ke Maiduguri.

“Ni na kira wannan taron na majalisar tsaro na gaggawa domin dakile wannan barazanar ta rashin tsaro da ke kunnu kai a birinin Maiduguri da kuma wasu sassan karamar hukumar Jere. ”

A cewarsa, “Bisa rahotanni sirri da ofishin gwamna ya samu, ana samun karuwar ayyukan ‘yan daba a wasu sassan jihar da kuma a karamar hukumar Jere.” Inji Zulum

Zulum ya bai wa al’ummar jihar tabbacin cewa, gwamnatinsa, ba za ta bari irin wadannan ayyukan na bata gari a jihar su ci gaba da ta’azzara ba.