Ba Mu Da Wata Yarjejeniya Da Wani Ɗan Takara – TIGMEIN
Kungiyar Wayar Da Kai Da Ci gaban Mabiya Darikar Tijjaniyyah ta kasa (TIGMEIN) ta bayyana cewa ba ta kulla wata yarjejeniya da wani dan takarar siyasa ko jam’iyyar siyasa ba a halin yanzu, dangane da babban zaben shekarar 2027.
Bayanin hakan ya fito ne daga bakin shugaban kungiyar na jihar Kaduna, Malam Nasir Bello, yayin taron masu ruwa da tsaki na TIGMEIN wanda aka gudanar a Kaduna.
Bello ya ce kungiyar tana tattaunawa da masu ruwa da tsaki a harkokin siyasa, amma har yanzu ba ta yanke shawarar jam’iyyar ko dan takarar da za ta mara wa baya a zaben 2027 ba.
Yace an shirya taron ne domin yin nazari akan shugabanci da kuma makomar kungiyar a zaben shekarar 2027 inda yace kungiyarsu tana da gudummawar take bayarwa a zabukan Kasar Nan.
A cewarsa, TIGMEIN kungiya ce da ke da alaka da jam’iyyun siyasa daban-daban a fadin Nijeriya, ba tare da nuna wariya ga kowace jam’iyya ba.
Ya kara da cewa gayyatar wakilan jam’iyyun siyasa daban-daban, ciki har da jam’iyya mai mulki da jam’iyyun adawa, zuwa taron na daga cikin kokarin samar da fahimtar juna da tattauna hanyoyin hadin gwiwa.
Bello ya kuma bayyana cewa kungiyar ta tsara dabarun wayar da kan jama’a da suka hada da kananan hukumomi, mazabu, rumfunan zabe da al’ummomi, tare da gudanar da ziyara gida-gida domin tuntubar mambobi da magoya bayanta.
Ya jaddada cewa babu wata yarjejeniya da aka cimma da wani dan takara a yanzu, yana mai cewa shugabancin kungiyar ne zai sanar da matsayar karshe bayan kammala shawarwari da tantance dukkan batutuwan da suka dace.
Ya bukaci mambobi da magoya bayan kungiyar da su guji daukar matakin siyasa da kansu ko yada bayanan da ba su fito daga shugabancin kungiyar ba, tare da ci gaba da kasancewa cikin hadin kai da jiran sanarwar hukuma kan matsayarta a babban zaben 2027.













