Nijeriya Ta Samu Kwarin Gwiwar Zuwa Kofin Duniya

A hankali dai tawagar ‘yanwasan kwallon kafa ta kasa Super Eagles tana sake samun kwarin gwiwar damar zuwa gasar cin kofin duniya sakamakon hukunce-hukuncen da hukumar kwallon kafa ta duniya FIFA take yi a kan wasu kasashen da suka aikata laifi a lokacin buga wasannin neman cancantar shiga gasar.

Kwamitin ladabtarwa na hukumar kwallon kafa FIFA ya sanar matakin da ta dauka a kan tawagar kwallon Afirka ta Kudu, inda ta rage mata maki uku, sannan ta ci ta tarar kudi.

• Nazari Kan Yadda Za A Iya Samun Wadatacciyar Riba A Kiwon Jimina
• Fim Na Nezha 2 Na Kasar Sin Ya Kara Samun Lambar Yabo

Kwamitin ya gano kasar ta yi laifi ne wajen amfani da danwasan da bai kamata ya buga wasan ba, wanda tawagar da fafata da kasar Lesotho wato Teboho Mokoena da aka buga a ranar 21 ga watan Maris na shekarar 2025.

FIFA ta ce amfani da danwasan ya saba da sashe na 19 da kundin laifuka na hukumar, sannan ya kuma saba da sashe na 14 na kundin shirye-shiryen farko-farko na gasar cin kofin duniya na shekarar 2026.

FIFA ta ce bayan nazarin binciken da aka gudanar, ta kwace nasarar da Afirka ta Kudu ta samu, sannan ta ba kasar Lesotho nasara a wasan. Wadanda aka ladabtar saboda laifukan dai suna da kwana 10 domin daukaka kara a gaban kwamitin daukaka kara na kwamitin ladabtarwa na Hukumar FIFA.

Me Hakan Ke Nufi Ga Tawagar Nijeriya?

Ga Yadda Tsayuwar Rukunin C Yake

A ranar 9 ga watan Satumba ne tawagar Super Eagles ta Nijeriya ta tashi da kunnen doki a wasan da ta buga da tawagar ta Afirka ta Kudu a wasan neman gurbin shiga gasar cin kofin duniya. Bayan wasan ne kasar Afirka ta Kudu ta kara zama a saman teburi da maki 17 cikin wasa takwas da ta buga a Rukunin C.

Tawagar Jamhuriyar Benin ke biye mata da maki 14, sai kuma Nijeriya da ke mataki na 3 da maki 11.

Sai dai kuma Nijeriya ta kasance tana da maki daya ne da na Rwanda da ke mataki na 4, sai kuma kasar Lesotho da ke da maki 6 a mataki na 5, sai kuma Zimbabwe ta karshe da maki 4.

Kasashe tara ko 10 ne za su wakilci nahiyar Afirka a gasar cin kofin duniya na 2026, wadda kasashe 48 za su fafata kuma kasashen Amurka da Medico da Canada za su karbi bakunci.

Canjin Da aka samu Bayan Hukunci

A ka’idar wasannin neman gurbin, duk tawagar da ta kare a mataki na daya daga kowane rukuni guda tara na nahiyar Afirka ce za ta samu gurbi kai-tsaye. Daga baya sai a zabo hudu mafiya kokari da suka kare a mataki na 2, inda za a fitar da daya daga cikinsu sannan ta kara da wata tawagar daga nahiyar.

Yanzu da aka rage wa Afirka ta Kudu maki uku, zai zama tana da maki 14 kenan, dai-dai da tawagar kasar Benin, ita kuma kasar Lesotho ta samu karin maki uku zuwa maki tara maimakon shida a baya kafin a kara mata maki uku.

Yanzu wasa biyu ne suka rage wa kowace tawaga, inda Nijeriya take bukatar samun nasara a wasannin guda biyu. Idan ta samu nasara a wasannin da za ta buga da Lesotho da Benin, zai zama Nijeriya da maki 17 ke nan jimilla.

Sai dai kuma hakan zai ta’allaka ne da wasannin sauran kungiyoyin, domin idan Afirka ta Kudu ko Benin daya daga ciki ta ci wasa daya, ta yi canjaras a wasa daya, za ta koma maki 18. Amma idan ta yi rashin nasara a wasa daya, ta ci daya za ta tsaya da maki 17 ne, daidai ke nan da idan Nijeriya ta samu nasara a wasanninta biyu na gaba.

Ita Benin yanzu damarta ta karu, kuma akwai wasa tsakanin Nijeriya da Benin, wasan da za a iya kira da raba gardama domin shi ne wasan Nijeriya na karshe a rukunin na C.

Ke nan Nijeriya ta fi bukatar samun nasara a wasanninta biyu na gaba, sannan Afirka ta Kudu da Benin su rasa wasanninsu biyu na gaba, inda za ta kara da maki 17, su kuma suna 14. Haka kuma idan Nijeriya da Afirka ta Kudu suka karkare da maki daya, Super Eagles na bukatar kwallaye fiye da Afirka ta Kudu haka ita ma Benin. Yanzu haka Afirka ta Kudu na da yawan kwallaye +8, yayin da Nijeriya ke da +2.