Ranar ‘Yancin Kai: Gwamnatin Nijeriya Ta Bayar Da Hutun Aiki Ranar Litinin

Gwamnatin tarayya ta ayyana ranar Litinin 3 ga watan Oktoba a matsayin ranar hutu domin murnar cikar kasar shekaru 62 da samun ‘yancin kai.

Ministan harkokin cikin gida, Rauf Aregbesola ne ya sanar da hakan a wata sanarwa da ya fitar a ranar Laraba a Abuja ta hannun babban sakataren ma’aikatar, Dr Shuaib Belgore.

• Sojojin Nijeriya Sun Kashe ‘Yan Ta’addan ISWAP Da Dama A YobeSojojin Nijeriya Sun Kashe ‘Yan Ta’addan ISWAP Da Dama A Yobe

Ministan ya taya ‘yan Nijeriya murnar samun ‘yancin kai tare da tabbatar wa ‘yan kasar kudurin gwamnati na tinkarar kalubalen da kasar ke fuskanta.

Ministan ya umurci ‘yan Nijeriya da su yi amfani da wannan damar wajen yin tunani kan kalubalen da al’ummar kasar ke fuskanta da kuma rawar da za su iya takawa wajen magance su.

Ya bukaci ‘yan Nijeriya da su yi aiki tukuru tare da guje wa duk wani aikin laifi don samun arziki ta hanyar da bata dace ba.