Tawagar Jami’an ‘yan sanda da sojoji sun yi nasarar dakile wani harin da ‘yan bindiga suka kai kan babbar hanyar Kaduna zuwa Abuja ranar Litinin.
Rundunar ta kashe daya daga cikin ‘yan bindigar, tare da kwato bindiga kirar AK47 guda daya da kuma babura guda tara.
- Kungiyar ‘Yan Ta’adda Ta Ansaru Ta Ce Ba Ita Ta Kai Hari Kan Jirgin Kasan Abuja-Kaduna Ba
- Jami’an DSS Sun Cafke Wani Babban Kwamandan ISWAP A Kano
Kakakin rundunar ‘yan sandan jihar Kaduna, DSP Mohammed Jalige, ya tabbatar da faruwar lamarin a wata sanarwa da ya fitar a Kaduna.
Ya bayyana cewa, wannan matakin wata alama ce ta samun nasara da ta hanyar hadin guiwa tsakanin ‘yan sanda da sojoji a jihar Kaduna.
“A ranar Litinin, 13 ga watan Yuni da karfe 2:55 na rana tawagar ‘yan sanda ta ‘Operation Puff Adder’ da na rundunar ‘yan sanda ta ‘Operation Thunder Strike’ da ke sintiri na yau da kullum a hanyar Kaduna zuwa Abuja sun ci karo da ‘yan fashin a Sabon Sara.
“An yi musayar harbe-harbe a sakamakon haka sojojin kawancen sun dakile harin ‘yan bindigar wanda ya tilasta musu ja da baya cikin dajin yayin da aka kashe mutum guda.
“A binciken da aka yi a yankin, an gano bindiga kirar AK47 da kuma babura ‘yan bindigar guda tara,” in ji shi.
‘Yan sandan sun bukaci mazauna yankin da su kai rahoton duk wasu mutanen da ake zargi ga jami’an tsaro.
