‘Yan Sanda Sun Ceto Matar Shugaban APC Na Jihar Neja Da Aka Sace A Borno

Rundunar ‘Yan sanda ta Jihar Borno ta sanar da cewa, jami’anta sun samu nasarar ceto, Habiba Baffa, matar Usman Baffa, shugaban jam’iyyar APC na karamar hukumar Magama ta Jhar Neja da aka sace.

Kwamishinan ‘Yan sandan jihar, Mista Abdu Umar, ya tabbatar da haka yayin da yake mika matar ga iyalanta a garin Maiduguri ranar Alhamis.

• SEMA Ta Raba Wa ‘Yan Gudun Hijira Kayan Abinci A Jihar Borno
• Yansanda A Jihar Borno Sun Kama Tsoho Mai Shekara 80 Da Laifin Yi Wa ‘Yar Shekara 11 Fyade

Ya kuma kara da cewa, an sace matar ne a gidanta da ke unguwar Tunga a cikin garin Minna ranar Lahadi.

Ya ce,”A ranar Laraba jami’an kungiyar NURWT reshen Maiduguri suka sanar da mu tsintar matar a tashar motar Kano da ke nan birinin Maiduguri.”

Da muka ceto ta mun fahinci cewa, wasu ‘Yan bindiga ne suka sato ta daga Jihar Neja, suka a jiye ta a tashar motar Maiduguri” in ji shi.

Daga nan ne aka tuntubi mijinta, inda ya taso daga Jihar Neja ya hadu da matarsa.

Da take karin bayani, Habiba ya bayyana wa manema labarai cewa da misalin karfe 5 na asuba ‘yan bindigar suka kai musu hari a gidansu, inda suka bukaci inda mijinta yake suka kuma kwashi makudan kudade.

“Daga nan suka tafi da ni a cikin wata mota, ban san halin da nake ciki ba sai da na ganni a tashar motar Maiduguri,” Cewarta.