Da Dumi-Dumi: INEC Ta Dage Zaben Gwamnoni Da ‘Yan Majalisun Jihohi Zuwa Ranar 18 Ga Maris 

Hukumar zabe mai zaman kanta ta kasa (INEC) ta dage zaben Gwamnonin da ‘yan majalisun jihohi zuwa ranar 18 ga watan Maris din 2023. 

Idan za a tuna dai INEC ta ware ranar Asabar 11 ga watan Maris domin gudanar da zaben, amma sakamakon matsalolin da ake fuskanta daga na’urar BVAS da na sufuri, ta ce, ba zai yiyu mata ta iya gudanar da zaben a ranar da ta shirya ba.

• Zaben Shugaban Kasa: Kotu Ta Amince Da Bukatar INEC Na Sake Inganta BVAS

INEC ta cimma wannan matsayar ne a ganawar da shugabanninta suka yi a daren ranar Laraba.

“An dage zabukan ne zuwa mako guda domin mu samu damar kammala shirye-shirye,” a cewar wani jigo da ya shaida wa ‘Peoples Gazette’ kan ganawar a hirarsa da kafar ta wayar tarho a daren ranar Laraba

Ya ce, “Muna son mu tabbatar komai ya daidaita katin ranar 18 ga watan Maris.”

Har zuwa lokacin hada wannan rahoton ganawar na cigaba da gudana a shalkwatar INEC da ke Abuja

Cikakken labarin na tafe.