Mutum 7 Sun Shiga Hannu Kan Kisan Direba A Ondo

Rundunar ‘yan sandan Jihar Ondo ta ce ta kama wasu mutane bakwai da ake zargi da jefe wani direba mai shekaru 35 har lahira a ranar 10 ga watan Afrilu.

Leadership Hausa ta ruwaito cewa direban, Olorunfemi Tope ya yi hatsarin da ya yi sanadin mutuwar mutum daya tare da raunata wasu a hanyar Ijoka a Akure.

• Kasar Sin Ta Soki Amurka Bisa Kakabawa Wasu Kamfanoninta Takunkumi Dangane Da Batun Maganin Fentanyl
• Karsashina Yana Ga Rubutun Littafi Ba Fim Ba -Humaira K. Azare

Daga baya direban ya mutu inda aka yada bidiyon lamarin a yanar gizo.

Kakakin rundunar ‘yan sandan jihar, SP Olufunmilayo Odunlami-Omisanya, ya shaida wa manema labarai a ranar Litinin a Akure cewa, an kama mutanen bakwai ne da hannu a lamarin.

A cewar Odunlami-Omisanya, daga cikin mutane bakwai, Amos Victor, Boboye Ismail, Olatunji Samuel da Farotimi Pelumi, su ne manyan wadanda ake zargin.

Ya ce suna cikin wadanda aka dauka a faifan bidiyon suna kai wa marigayin hari.

Ya ce za a gurfanar da wadanda ake zargin a gaban kotu bisa zarginsu da kone-kone da kuma kisan kai, bayan kammala bincike.

“Mun sha fada ba adadi cewa ya sabawa doka daukar doka a hannu.

“Lokacin da wani hatsari ya faru, abin da muka fi mayar da hankali a kai shi ne yadda za mu kubutar da wadanda abin ya shafa ta hanyar kai su asibitoci mafi kusa don ba da agajin gaggawa ba tare da daukar doka a hannunmu ba.

“Ba daidai ba ne kowa ya dauki ran kowa ba; ya kamata mu bar doka ta dauki matakinta,” in ji kakakin.