Me Ya Sa Karin Kamfanonin Ketare Suka Samu Ra’ayin Bai Daya Kan Zuwa Kasar Sin Don Raya Kansu?

Bisa kididdigar da ma’aikatar kasuwanci ta kasar Sin ta fitar a kwanan nan, an ce yawan kudin jarin waje da kasar ta yi amfani da shi a watanni uku na farkon shekarar bana, ya kai kudin Sin Yuan biliyan 408.45, adadin da ya karu da kaso 4.9 cikin dari bisa na makamancin lokaci na bara, lamarin da ya shaida cigaban tattalin arzikin Sin ba tare da tangarda ba.

A cikin wannan adadi, yawan sabbin kamfanonin ketare ya zarce dubu 10, wanda ya karu da kaso 25.5 cikin dari bisa makamancin lokaci na bara. Yadda kamfanoni ke shiga kasar Sin don kara samun bunkasuwa ya riga ya zama wani muhimmin batu da manyan kafofin watsa labarai na kasa da kasa suke tattaunawa a yanzu.

• Tasirin Matsalolin Tsaro, Karancin Kudi Da Tsadar Rayuwa Ga Bukukuwan Sallar Bana

Akwai hasashen cewa, yawan kudin jarin da za a rika zuba wa sauran kasashe zai ci gaba da raguwa a shekarar 2023. Bisa wannan yanayin da ake ciki, kasar Sin ta sha wuya wajen samun wannan sakamako na jawon jarin waje, amma hakan ba abu ne da ya wuce zato ba.

Dalili kuwa shi ne, idan muka duba fannonin da kamfanonin suke zubawa jari, za a iya gano cewa, sun fi zuba wa kasar Sin jari ne a fannonin kimiyya da fasahohin zamani, da karin ingancin masana’antu, a kokarin more damammakin cigaban kasar Sin mai inganci.

A matsayin babbar kasuwa ta biyu ta sayen kayayyaki ta duniya, da babbar kasuwa ta farko ta sayar da kayayyaki ta yanar gizo ta duniya, babu shakka kasar Sin ta zama tamkar wani babban kek ga jarin waje. A waje daya kuma, kasar Sin da ke bude kofarta ga waje, na son more wannan kek na ta tare da sauran kasashen waje, tare da kara girmansa.

Kamfanin Tesla, da Airbus, da Astrazeneca, sun sanar da kafa masana’antu, da kara zuba jari a kasar Sin daya bayan daya, lamarin da ya shaida cewa, kamfanonin ketare na da kwarin gwiwa game da kasar Sin, domin sun gane cewa, zuba jari ga kasar Sin shi ne kokarin kago makoma mai haske.

Wasu rahotannin baya bayan nan sun bayyana cewa, ana sa ran shugaba Joe Biden na Amurka, zai sanya hannu kan wata dokar shugaba nan da wasu makwanni kadan masu zuwa, wadda za ta takaitawa kamfanonin Amurka adadin jarin da za su iya zubawa, a wasu muhimman fannonin tattalin arzikin kasar Sin, ciki har da fannin kirar bangarorin harhada na’urorin latironi na “semiconductors”, da fannin kwaikwayon tunanin bil adama na AI.

Da yake tsokaci game da hakan, yayin taron manema labarai da aka saba gudanarwa na yau Jumma’a, kakakin ma’aikatar harkokin wajen Sin Wang Wenbin, ya ce ainihin dalilin Amurka na kakaba takunkumi a fannin jarin da ake iya zubawa a Sin, shi ne dakile ikon Sin din na samun ci gaba.

Wang ya kara da cewa, Sin na matukar adawa da wannan mataki, za ta kuma lura matuka da yanda abubuwa ke gudana, tare da daukar matakin kare hakkoki, da moriyar ta yadda ya kamata. (Kande Gao, Saminu Alhassan)