Uku daga cikin sauran dalibai bakwai (7) na kwalejin Gwamnatin tarayya da ke Birnin Yauri ta jihar Kebbi da aka yi garkuwa da su, sun samu kubuta.
Daliban da aka sake din su ne: Elizabeth Ogechi Nwafor, Esther Sunday da Aliya Abubakar.
Shugaban kungiyar daliban da aka yi garkuwa da su, Malam Salim Kaoje, shi ne ya sanar da hakan, ya ce, sabbin wadanda aka sake din sun iso jihar ne a ranar Litinin da rana.
“Eh sun kara sakin dalibai uku a daren ranar Lahadi. Yanzu haka su na hannun Gwamnati,” Kaoje ya shaida.
Sai dai bai bayyana ko sun biya kudin fansa kafin a sake daliban ba.
Idan za a tuna dai masu garkuwa sun sace daliban FGC Birnin Yauri su 96 a ranar 17 ga watan June na 2021. An samu nasarar amso da sama daga cikinsu bayan biyan kudin fansa kamar da ya rage saura dalibai bakwai.
Sannan a watan da ya gabata masu garkuwan karkashin jagorancin shugabansu Dogo Gode, suka saki dalibai hudu Bilha Musa, Faiza Ahmed, Rahma Abdullahi da Hafsa Murtala.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
