Wasu ‘yan bindiga dadi da ba a san ko su waye ba, sun kashe mamba a kwamitin yakin zaben shugaban kasa na jam’iyyar APC a Jihar Imo, Kaftin Tony Enoch.
Mista Enoch tsohon Kaftin ne a rundunar sojin Nijeriya kuma makusancin gwamnan Jihar ta Imo, Hope Uzodimma ne, an kashe shi a karamar hukumar Oru da ke jihar.
- Gwamnati Za Ta Kashe Biliyan 22.44 Kan Ciyar Da Fursunoni A 2023
- Ma’aikatan Filato Sun Fara Yajin Aiki Kan Rashin Biyan Su Albashi
Har-ila-yau, shi Tony shi ne Ko’odinetan wata kungiyar siyasa mai suna ‘Grow Orlu Project’ da aka samar da zummar tallafa wa tafiyar siyasar zababben Sanatan Imo ta yamma, Osita Izunaso.
An nakalto cewa an kashe shi ne a lokacin da ke kan hanyarsa ta zuwa wani taron tanawa na masu ruwa da tsaki na jam’iyyar APC da zai gudana a shalkwatar Uru ta Gabas.
Wakilinmu ya nakalto cewa bayan kisan nasa a kusa da makarantar Awomama Technical School da ke Oru ta Gabas, ‘yan bindigan sun yasar da gawarsa a cikin wata motar tirakta.
Majiya daga yankin na cewa an farmaki mamacin ne a lokacin da makasan suka bukaci ya tsayar da motarsa kafin daga bisa suka bindige shi har lahira.
Har zuwa lokacin hada wannan rahoton, Kakakin hukumar ‘yansandan jihar Imo, Henry Okoye, bai fitar da bayani kan lamarin ba.
Amma ya bada tabbacin cewa zai bincika kuma zai sanar da wakilinmu sakamakon binciken nasa. Sai dai har zuwa aiko da rahoton bai yi hakan ba.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
