Shugabancin Majalisar Wakilai: Betara Da Gagdi Sun Mara Wa Abbas Baya

Bisa ga dukkan alamu, ‘yan takarar kujerar kakakin majalisar wakilai daga jam’iyyar APC – Tajuddeen Abbas da Benjamin Kalu za su iya kai wa ga tudun na-tsira a shugabancin majalisar wakilai ta 10.

Wannan alamu na zuwa ne a daidai lokacin da wasu fitattun ‘yan takarar kujerar shugaban majalisar wakilai ta 10 suka yanke shawarar janye takararsu suka marawa ra’ayin jam’iyyar APC mai mulki baya.

• ANA Ta Bukaci Hadin Kan Kasa A Batun Shugabancin Majalisa Ta 10

Aliyu Betara daga jihar Borno da Yusuf Gadgi daga jihar Filato sun janye daga takarar a ranar Lahadi ne bayan wata ganawar sirri da shugaban kasa Bola Tinubu a fadar shugaban kasa da ke Abuja.

Ganawar ta samu halartar mataimakin shugaban kasa, Kashim Shettima; shugaban ma’aikatan fadar shugaban kasa kuma kakakin majalisar wakilai ta tara, Femi Gbajabiamila, tare da gwamnan jihar Neja, Mohammed Bago.

Bayan ganawar, mataimakin shugaban kasa, Shettima yayi jawabi ga manema labarai inda ya nuna jin dadi da shugaba Tinubu ya yi da shawarar Betara da Gagdi na fifita muradun jam’iyyar APC akan burin kansu.