Bayan Daukar Rafinha, Barcelona Ta Taya Lewandowski

Kungiyar kwallon kafa ta Barcelona ta taya dan kwallon tawagar Poland, mai buga wasa a kungiyar kwallon kafa ta Bayern Munich, Robert Lewandowski kuma shugaban Barcelona, Joan Laporta ya ce yana fatan kungiyar za ta amince da tayin da suka yi.

Dan wasan mai shekara 33, ya koma Bayern Munich ne tun a shekara ta 2014, wanda a watan Mayu ya sanar cewar yana son gwada kwazonsa a wata kungiyar a bana kuma Barcelona kawai yake hari.

• Barcelona Ta Dauki Kessie Da Christensen

Shugaban na Barcelona ya ce ‘sun taya dan wasan, suna jiran amsa, za su gani ko cinikin zai tabbata bayan da ya rage saura kakar wasa daya kwantiragin Lewandowski ya kare a Bayern Munich.

Laporta bai sanar da kan nawa ta taya dan kwallon ba, amma wasu rahotanni na cewar ta taya kan fam miliyan 33.8 da karin tsarabe-tsaraben fam miliyan 4.2 kuma Lewandowski ya ci kwallo 238 a gasar Bundes Liga a wasanni 252 a kakar wasa takwas a Bayern da ta lashe Bundesliga takwas da Champions League.

Tuni kuma kungiyar kwallon kafa ta Barcelona ta kammala sayen dan wasan gaba na kungiyar kwallon kafa ta Leeds United, Rafinha, dan asalin kasar Brazil wanda tuni aka gwada lafiyarsa a kungiyar.