Shahararren mawakin Nijeriya Portable ya sha suka ga magoya bayansa bayan da ya fito fili ya nuna goyon bayansa ga jam’iyyar APC duk da cewa wasu daga cikinsu basa goyon bayan jam’iyyar.
Portable dai ya sha suka a shafukan sada zumunta ganin yadda ya goyi bayan gwamnan jihar Osun Adegboyega Oyetola wanda ke neman zarcewa daga kujerarsa a karo na biyu.
Mawakin dai ya fito fili, ya nuna cewa jam’iyyar APC ta biya shi makudan kudade domin ya goyi bayan jam’iyyar ganin yadda jam’iyyar PDP ta gayyaci shahararren mawaki David Adeleke wanda aka fi sani da Davido.
Magoya bayan Davido da dama an yi zargin cewa sun daina bibiyar mawaki Portable tun bayan da ya fito fili ya nuna goyon bayansa a kan gwamna mai ci Adegboyega Oyetola.
Sai dai Portable ya fito fili ya bayyana cewa a lokacin da ya goyi bayan dan takarar gwamna Ademola Adeleke, wanda ke jam’iyyar PDP babu wanda ya kula shi saboda bai yi kaurin suna ba.
Portable ya kuma nuna wata tsohuwar waka da ya yi wa Ademola Adeleke a 2018 domin nuna goyon bayansa amma kuma wakar bata samu karbuwa a wurinsa ba saboda ba kowa bane.
Daga karshe dai yace ma magoya bayansa idan za su iya biyansa kudin da aka biya shi zai ajiye saboda yanayin waka ne saboda kudi sannan ya kamata su fahimci abinda yake ciki a yanzu.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
