‘Yan Ta’adda Sun Sake Sace Mutane 87 A Wani Sabon Hari Da Suka Kai Kaduna

Masu garkuwa da mutane sun sake kai wani mummunan hari a kan wasu mutane a Kajuru- Station da ke karamar hukumar Kajuru ta jihar Kaduna, inda suka yi garkuwa da mutane 87 a daren ranar Lahadi.

Harisu Dari, daya daga cikin matasan tashar Kajuru, ya tabbatar da faruwar lamarin, inda ya bayyana cewa ‘yan ta’addar sun kai harin da misalin karfe 10 na dare.

• Mahara Sun Sace Dalibai 200 A Kauyen Kaduna
• Da Dumi-Dumi: ‘Yan Bindiga Sun Kashe Mutum 9, Sun Yi Garkuwa Da 20 A Kaduna

Rahotanni na cewa, maharan ba kawai sun yi awon gaba da mutane kadai ba ne, sun yi barna, inda suka shiga shaguna jama’a tare da kwashe kayan abinci da sauran kayayyaki.

Wannan na zuwa ne kwanaki kadan bayan hari da suka kai na sace mata 15 da wani namiji a yankin Dogon-Noma kwanaki kadan kafin wannan harin.

A kwanakin nan dai kananan hukumomin Kajuru da Chikun suna fuskantar sace-sacen jama’a daga mahara, wanda hakan ya jefa jihar cikin wani yanayi na tashin hankali.

Dari, wanda al’amarin ya tayarwa da hankali, ya bayyana irin tashin hankalin da mutanen kauyen suka shiga a sakamakon harin na ‘yan bindiga.

Dari, ya jaddada bukatar gwamnati da ta dauki matakan gaggawa wajen dakile hare-haren ‘yan bindigar, yana mai bayyana cewa har zuwa safiyar yau Litinin, ba a tuntubi mutanen yankin da aka sace ‘yan uwansu ba.